Plantun de Prouvènço

Pèr coumpara dos planto d'encò nostre

Heteranthera rotundifolia & Pinguicula vulgaris

Heteranthera rotundifolia

Pontederiaceae

Nom en français : Hétéranthère à feuilles rondes.

Descripcioun :
Aquesto planto fourestiero trachis dins li risiero de Camargo mounte flouris l'estiéu. Nous vèn d'Americo troupicalo, e es au nostre, en Camargo, despièi 1987. Se recounèis à si fueio redouno e si flour vióuleto que duron gaire de tèms dins la journado. A de guèno membranouso (fotò). Se vèi en ribo de risiero o dins li passage de rodo. A la debuto es estado counfoundudo emé Heteranthera limosa, uno meno procho.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : alterno
Tipe bioulougico : Idroufite
Cicle bioulougico : Planto renadivo

Gènre : Heteranthera
Famiho : Pontederiaceae

Ordre : Commelinales

Coulour de la flour : Blanco
Petalo : irreguliero
Ø (o loungour) enflourejado : 2,5 à 3 cm
Flourido : Estiéu

Sòu : Na Cl
Autour basso e auto : Pancaro entresigna
Aparado : Noun
Remarco : Planto envahissènto
Juilet à setèmbre

Liò : Risiero
Estànci : Mesoumediterran
Couroulougi : Óurigino Americo troupicalo
Ref. sc. : Heteranthera rotundifolia (Kunth) Griseb., 1866

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.